
بقلم – حسن السر
قبل الحرب كنت في مأمورية لي ولاية شمال كردفان، حاضرتها مدينة الأبيض، وكانت المأمورية من أجمل المأموريات، اتحركنا من أم درمان ولمن وصلنا مدينة بارا شربنا عصير الليمون.
واتذكرنا أغنية «ليمون بارا»، هي من كلمات وألحان الشاعر يوسف آدم حسب الدائم، واشتهر بغناها الفنان عبد القادر سالم.
رحلتنا كانت عبر طريق الصادرات مختصرة شديد، مقارنة بزيارتي لي مدينة الأبيض أثناء الحرب بالطريق التاني، الكان معاناة عديل، والتفاف عبر طرق طويلة ومكلفة.
والحمد لله رب العالمين، بعد أربع سنوات من الوقوف والانقطاع، رجعت الحياة لي طريق الصادرات (أم درمان – جبرة الشيخ -بارا – الأبيض)، بقرار من لجنة تنسيق شؤون الأمن بولاية الخرطوم، بفتح الطريق قدام حركة العربات والشاحنات والبصات السفرية.
القرار جا بعد جولة ميدانية للجنة برئاسة والي الخرطوم، أحمد عثمان حمزة، وبمشاركة مدير شرطة الولاية، وقائد الفرقة السابعة مشاة، اتفقدوا فيها الارتكازات ونقاط التفتيش على طول الطريق لحدي الحدود بين ولايتي الخرطوم وشمال كردفان، بعد ما تحسنت الأوضاع الأمنية واتشالت مخلفات الحرب واتأمن المسار.
واستقبلت ولاية الخرطوم أول البصات والعربات الجاية من شمال كردفان، وسط ترحيب وارتياح كبير من المواطنين والسواقين الرجعوا يستخدموا الشريان الحيوي ده بعد سنين من الوقوف.
طريق الصادرات واحد من أهم الطرق البتربط العاصمة بولايات غرب السودان، وشريان رئيسي لحركة الصادر ونقل البضائع والسلع.
وهو بختصر المسافة لي مدينة الأبيض عبر كوستي بي حوالي 230 كيلومتر، وده معناه تقليل زمن الرحلات، وتخفيض تكاليف النقل، وتخفيف العبء على المواطنين، وانعكاس مباشر على أسعار السلع في الأسواق.
وكمان فتح الطريق خطوة مهمة نحو تطبيع الحياة، وربط الخرطوم بكردفان ودارفور، وتنشيط حركة التجارة والنقل بين الولايات.
مدينة جبرة الشيخ
محطة مهمة في هذا الطريق وفي معركة الكرامة.
امدرمان جبرة الشيخ بارا الأبيض هذا عندالتحرك من ولاية الخرطوم .
أما طريق العودة من شمال كردفان يكون الأبيض بارا جبرة الشيخ امدرمان .
ففي جبرة الشيخ كان اللقاء كان الإحتفال بالعودة .
أكد والي الخرطوم إنو الطريق عندو أهمية استراتيجية واقتصادية كبيرة، وأشار للجهود الجارية لإنشاء بوابة متكاملة بالمنطقة الحدودية بين الخرطوم وشمال كردفان، تتوفر فيها الخدمات الضرورية للمسافرين، بالإضافة لوجود القوات الأمنية للتأمين والرقابة وتنظيم الدخول والخروج.
ووجهت اللجنة بمنع مرور عربات الصالون البتشيل البضائع والأمتعة فوق أسقفها، لما تمثله من خطورة على حركة المرور وحياة المواطنين، مع التشديد على الالتزام بالموجهات المرورية والأمنية.
آخر القول
فتح طريق الصادرات أكتر من رجوع عربات لي مسارها، ده رجوع الثقة، ورجوع التواصل بين الأهل، ورجوع عجلة الاقتصاد للدوران. كل كيلومتر اتختصر هو ساعة تعب أقل على مسافر، وجنيه أقل في تكلفة بضاعة، وخطوة أقرب نحو استقرار طال انتظاره.
وإذا استمر التأمين والصيانة والخدمات على طول الطريق، القرار ده حيتحول من خبر فرح عابر، لبداية حقيقية لإعادة إعمار الدمرتو الحرب، وربط السودان ببعضو من جديد، من أم درمان لي بارا لي الأبيض، ومن هناك لي كل الغرب.
كسرة
من أجمل القول
درب الحبيب رملة
نمشيهو في القمرة
فرق الحبيب جمرة
دواي ما خبرة
نتقبل القبلة
نبكي بلا سبلة
حكيم سيد الابرة
دواي ما خبرة
جنتنيني انا انا
حكيم سيد الابرة
دواي ما خبرة
ليمون بارا
يا اخوانا شيلو الجلالة
ليمون بارا
سبحان الله وتعالى
ليمون بارا
الصفار الكمّل جمالا
والخضار الشايل نوّارا
لو ما قيل القوالة
أنا بمشي لي كُبَارَا
الصفار ده بسكن جوارا
عينيها الريال أب طارة
ونفيسها ريحة نيالا
ليمون بارا أصفر كُبَارَا
الخضار ده بمشي ديارا
ونعيش معاها سجالا
يا ضمير جدي الغزالة
تعالى الفولة أم دوّاره
بيت أمك قبة زوارا
ليمون بارا أصفر كُبَارَا
يا خواني شيلو الجلالة
سبحان الله وتعالى
من عين الحاسد تتضارى
الحاسد روحو مكّارة
الحاسد عينو جبارة
ليمون بارا أصفر كُبَارَا
الرشيقة بنيّة البقارة
الرشيدة عجيلة البقارة
الشافها جنيهين بُشارة
شعرك جميل تربالة
شيل الباغة فوقا جسارة
ليمون بارا أصفر كُبَارَا



